Consideran que é una manobra para obter os decisivos votos da emigración nas eleccións de Xuño.
Con motivo da presentación do novo portal que a Xunta de Galicia
inaugura esta semana destinado aos emigrantes e aos Centros
Galegos, a Asociación Cultural Fillos de Galicia remitiu aos
medios un comunicado no que expresa a súa “indignación” ante o que
eles consideran una “mera actuación electoralista” do Partido
Popular. Ao seu entender, se a Xunta quixese atender as
necesidades dos emigrantes a través de Internet apoiaría o traballo
que Fillos de Galicia vén facendo dende 1997, ou, cando menos,
tería reaccionado cando os propios centros recoñeceron a necesidade
de dispoñer dun espazo común en Internet a finais do 2003, no VII
Congreso de Colectividades Galegas. “En canto detectamos que os
centros necesitaban o que nós levabamos xa anos ofrecendo aos
emigrantes a nivel particular, unha organización con tan escasos
recursos como a nosa reaccionou e, en apenas 3 meses, creamos
Galeguidade.net. Por que a Xunta tardou un ano e medio? Só se
explica porque queren acadar un rédito electoral”, apunta Manuel
Casal Lodeiro, presidente de Fillos de Galicia, á luz de que a
presentación ten lugar xusto no tempo da visita de Manuel Fraga
a Arxentina e a Uruguai desta semana.
Quéixanse así mesmo do despilfarro que supón crear o que para eles
non é senón “unha copia serodia e absurda dos nosos portais
Fillos.org, Atopadoiro.org e Galeguidade.net“, gastando unha
cantidade que deberían facer pública, para duplicar un esforzo de
anos e partiren de cero cando Fillos xa vén dando un servizo diario e
gratuito a miles de visitantes e usuarios rexistrados, e conta
cunha importante rede de colaboradores voluntarios. “Hai anos que
solicitamos o seu apoio e que puxemos á súa disposición a
nosa experiencia e relevancia como portal máis visitado da
emigración galega, pero a súa resposta foi practicamente nula”,
quéixanse desde a asociación, que unicamente recibe 300 euros ao
ano, desde o 2003, da Consellería de Emigración.
“Pasar por alto agora o inmenso traballo xa realizado polos propios
emigrantes para partir de cero nun novo proxecto, totalmente baixo o
seu control, parécenos unha omisión moi cara que non se pode tolerar
nunha administración pública”, critican.
Ademais protestan porque esta Consellería premiou no citado ano 2003
un ensaio escrito polo presidente de Fillos de Galicia no que se
poñía de manifesto a necesidade de actuar no eido de Internet para
manter a identidade e a cultura galegas na emigración. “A día de hoxe
(ano e medio despois) aínda estamos esperando a que o publiquen”,
critica o seu autor. “Temos a sensación de que o premiaron para
demoraren precisamente a súa publicación e así non quedar en evidencia
pola súa nula actuación en Internet e pola súa falla de interese en
apoiar o noso labor pioneiro”, engade. Opinan tamén que é
totalmente contraditorio premiar un ensaio que defende dun modo
teórico un proxecto (Fillos.org) que nunca foi apoiado na práctica
de xeito decidido, e ademais denuncian que non é a primeira vez que a
Xunta realiza actuacións deste tipo e que finalmente resultan un
rotundo fracaso e un gasto inútil que deben pagar todos os galegos.
Fillos de Galicia esixe no seu comunicado que a Xunta de Galicia
explique por que se gasta diñeiro público (e canto foi) en duplicar
o seu proxecto en lugar de apoialo o sumalo ao seu. Tamén consideran
preocupante e sospeitoso que en Galiciaaberta.com a súa asociación
sexa excluida tanto dos enlaces como do directorio de entidades da
emigración. “De feito enviaron comunicación acerca do portal a todas
as entidades da emigración agás a nós, que nos tivemos que enteirar
por terceiros de que estaba en marcha este proxecto copia do noso”,
engaden.
É incríbel que os nosos dirixentes sigan a facer da emigración un instrumento electoral. En lugar de loitar para que non teña que emigrar ninguén, e quen o faga sexa por gusto e non por obriga, adican os seus esforzos e os nosos cartos a atraer os votos dos que andan fóra. Esa é a súa única preocupación, asegurar a poltrona.
Cambio de goberno xa!
E non só iso, senón desprezando iniciativas como Fillos de Galicia, un proxecto que comezou desde cero co traballo voluntario de poucas persoas que só contaban coa ilusión e a satisfación de axudar aos nosos emigrantes, para agora mal copialo para comprar os seus votos.