Efecto fuel

Estoulle dando á tecla por un remoto mecanismo atávico-profesional ou por mero acto reflexo, como os rabos da lagartixa separados da lagartixa propiamente dita. Teño o brazo mazado de tanto beliscarme e ando mareado de tanto palpar a cabeza a ver se levei algún golpe que non recordo. ¿Pasou algo o domingo?

Ben sei que os periódicos do luns recollían que houbo unha macromanifestación, pero nos audiovisuais non houbo a penas rastro. Mesmo teño unha vaga idea de que a tarde aquela, nunha emisora que asegura que dá todo noticias, so escoitei falar de 20 barcos que loitaban contra a marea. Supoño que contaban as lanchas da Garda Civil, que a falta doutros medios, debían estar apañando o fuel con tricornios. Esa noite, na tele, despois das habituais imaxes de indíxenas que confesan vivir do mar, logo das afirmacións contundentes duns señores que van moito por Caión, botaron imaxes de pernas (si, de pernas) e unha aglomeración de paraugas, pero non moito máis.

A culpa é por facer as cousas en Santiago, que non está preparada para estas cousas e os fotógrafos debéronas pasar canutas para conseguir que unha imaxe valera máis que 250 palabras. E non é localismo, porque tamén luciría máis en Vigo. Ou quizais fose, como di un meu amigo rabudo aínda que disperso, que os organizadores deberan chamarse Plataforma ¡Pasta Ya!, que xa verían como os días anteriores lles facían entrevistas anunciando a manifestación, e logo unha chea de reportaxes con simpáticos cidadáns de Palencia dando as razóns de terse desprazado a participar. Outro amigo pensa que tamén pasa que uns e outros parecen querer enterrar o asunto porque os convocantes non eran exactamente os adecuados.

Menos mal que Aznar dixo antonte que comprendía as razóns dos manifestados. Claro que o presidente compórtase xa como un ex presidente, e tanto lle ten todo. Anda de estrela invitada nos infoshows da televisión de Berlusconi e nin debe ler os informes que lle pasan. Cando lle critican a falta de medios, responde que ningún país ten medios para evitar que os petroleiros partan, sen reparar en que se refiren ós medios logo de que os petroleiros partan. Non está o tanto de que os barcos capaces de coller vertidos do mar son todos de fóra, e que o único exército que está colaborando agora nos labores de limpeza é o belga. Ou é que xa se ve como presidente europeo, ou é que fai caso desas noticias dos 20 barcos.

No meu caso, penso que estou así polo efecto do fuel ese que é malo pero a modo. No del, non lle encontro explicación.