Misterios sen resolver

Sinceramente, estou tan sobrecollido polo que pasou e polo que pode pasar e, ó tempo, tan farto coma vostedes do petroleiro das narices. Mesmo bastante máis farto. Pero á espera de que o temporal escampe, trasladolles algúns misterios sobre o caso que a mi se me escapan, por se a alguén se lle ocurre a solución, e se non, polo menos que nos consolemos entre todos.

Misterio nº 1 ou dos Técnicos. Todos os expertos e coñecedores destas cuestións, mismo algúns entrevistados (logo de que se peche o micro) aseguran que o máis práctico era traer o buque a porto ou a resguardo, e alí trasvasar a carga. Daquela, ¿qué técnicos consultaron os que tomaron a decisión de alonxar o Prestige?, ¿desapareceron? (os técnicos, non os que tomaron a decisión), ¿ingresaron nun mosteiro trapense para redimir o seu pecado?, ¿fuxiron e están asesorando a outros inocentes mundo adiante?

Misterio nº 2 ou Ni gota-ni gota. En El País¸o tal capitán Apocalipsos di que do primeiro envión saltaron as tapas do rexistro de catro ou cinco tanques, e por alí comezou a escorrer fuel. Mentras levaban o barco de acó para aló, todo sacudido, ¿como conseguiron que non vertera máis?, ¿pechando as tapas con cinta americana?, ¿poñéndolle caixas de cervexa enriba?

Misterio nº 3 ou da Mancha Lewinski. ¿Por qué esas manchas que saen tan fermosas (é un decir) e tan persistentes nas imaxes dos satélites se achican ó paso dos avións de recoñecemento? ¿Cómo a que foi onte unha mancha de 11.000 toneladas se convirte mañá en dúas de 100 metros por 60 e algunhas pequenas? ¿É un caso de pudor hidrocarbúrico? E pola contra ¿o combustible que usa un barco pode formar unha mancha de 30 kilómetros de longo?, ¿en canto lle sae encher o depósito?

Misterio nº 4 ou do Total Control Mix. Se houbo unha resposta inmediata á crise, ¿por qué tardaron dúas semanas en considerar que xa había material bastante para realizar a limpeza?, ¿estaban agardando unha promoción de ferramentas de xardín en Alcampo para non escangallar o déficit cero?

Misterio nº 5 ou O barato sae Caro. O Plan Nacional de Salvamento 1998-2001 aseguraba que “los buques de salvamento tienen la función de asegurar el remolque de grandes buques y actuar en grandes siniestros. Sin embargo la realidad es que, dado lo infrecuente de este tipo de acontecimientos, estas unidades han pasado la mayor parte de su tiempo en espera”. ¿Onde está agora o agudo que o redactou? ¿pódese aplicar esta consideración ó Exército, que está aínda máis ocioso?

Misterio nº6 ou Global. ¿Estánnos tomando por idiotas ou é aprensión miña?