Hernández & Fernández

A pasada semana chamáronme dunha emisora arxentina para que lles contara como estabamos por aquí, deferencia que lles agradecín tendo en conta como están por alí. Preguntáronme polas consecuencias da marea negra (esa que non hai) no turismo, e díxenlle que o grave eran as demais consecuencias, porque co turismo nunca se sabe. Despois do Mar Egeo, os turistas facíanlle máis fotos ós restos enferruxados que á Torre de Hércules. E o domingo pasado en Muxía había tanta xente como na Virxe da Barca.

Eu teño un amigo moi solidario (supoño que teño máis, pero falo deste), que o domingo saíu da casa armado co kit completo de botas, pala, angazo e roupa impermeable. Colleu cara Barrañán, e na praia, no medio da merda, onda un 4x4, había dous axentes do Servicio Forestal da Xunta, perfectamente uniformados e dotados de prismáticos e mancontros.

-Que hai, veño axudar a limpar.
-Falta fai, si señor, que esto está fatal -contestoulle un.
-Pois si, estar está fatal- apoiou o outro.
-¿Por onde empezo?, ¿onde está a xente?
-As cuadrillas están en Razo, pero habería que limpar tamén aquí, que está fatal -dixo o primeiro, Hernández para entendernos.
-Fatal si que está - sentenciou Fernández.
Consensuado o estado de Barrañán, Hernández tirou de mancontro.
-¿Razo?, habería que actuar en Barrañán, esto está fatal... xa... Oia -díxolle ó meu amigo- ¿vostede trae material?
-Material traio para min, non sabía que...
-¿Razo?, material non temos moito, pero aquí hai interese.
Nese momento, Fernández, que avizoraba cos prismáticos, fixo un descubrimento na distancia.
-¡Alí hai tres paleadoras!
-¡Temos tres paleadoras! -comunicou gozoso Hernández polo aparato, e inquiriu a Fernández- ¿con xente?
-Sen xente.
-¿Podiades mandar a alguén?... Ah, xa.-preguntou Hernández, e logo calou.
-¿Que, van vir ou non? -interesouse o meu amigo.
-De momento non, pero se pode esperar un pouco...
-Pois non, non teño toda a mañá
-E que nós temos que trasladar a un paxaro - desculpouse Hernández.
-Si, temos que levar un paxaro -asentiu Fernández.

Colleron o 4x4 e fóronse. O meu amigo tirou para Caión. Na praza había un coche de Antena 3, outro duns ecoloxistas franceses e un de Protección Civil. Non, non sabían de cuadrilla ningunha (os de Protección Civil), pero onte si que houbera. Estaban agardando ordes, e mentres dirixían o tráfico. Meu amigo meteuse no bar a comer algo e ver un partido do Albacete, e eso que non lle gusta o fútbol.